ឡាវ៖ ក្បាលម៉ាស៊ីននៃរដ្ឋាភិបាលឡាវត្រូវបានរុះរើសាជាថ្មម្តងទៀត នាសម័យប្រជុំសាមញ្ញពេញអង្គលើកទីបួន នីតិកាលទីប្រាំបួននៃរដ្ឋសភាជាតិឡាវ ដែលបានប្រារព្ធធ្វើនៅក្នុងរដ្ឋធានីវៀងចន្ទន៍ប្រទេសឡាវកាលពីចុងសប្តាហ៍កន្លងទៅ។ នេះបើតាមការចុះផ្សាយដោយទូរទស្សន៍ក្នុងស្រុកឡាវ។
អតីតនាយករដ្ឋមន្រ្តី Phankham Viphavanh នៅក្នុងសុន្ទរកថារបស់លោកក្នុងកិច្ចប្រជុំនាវិមានរដ្ឋសភាជាតិ បានប្រកាសពីការលាលែងពីតំណែងនាយករដ្ឋមន្រ្តី ដោយលោកបានលើកហេតុផលពាក់ព័ន្ធនឹងកត្តាវ័យ ដែលលោកត្រូវដល់ពេលចូលនិវត្តន៍ រួមជាមួយនិងបញ្ហាសុខភាពផ្ទាល់ខ្លួនមួយចំនួនរបស់លោកផងដែរ។
គួររំឮកថា លោក Phankham Viphavanh ដែលកើតនៅឆ្នាំ១៩៥១ បច្ចុប្បន្នមានវ័យ ៧១ឆ្នាំ ត្រូវបានរដ្ឋសភាជាតិបោះឆ្នោតជ្រើសតាំងជានាយករដ្ឋមន្រ្តីឡាវ កាលពីខែមីនា ឆ្នាំ២០២១ កន្លងទៅ។ លោកក៏ធ្លាប់បានជ្រើសតាំងជាអនុប្រធានាធិបតី នាយករដ្ឋមន្រ្តីរង និងជារដ្ឋមន្រ្តីក្រសួងអប់រំឡាវ រួមទាំងជាអភិបាលខេត្តហួផាន់ (Huaphan) ជាដើម។
ដោយឡែក ក្នុងកិច្ចប្រជុំនេះដែរ រដ្ឋសភាជាតិឡាវក៏បានប្រកាសឯកភាពបេក្ខភាពនាយករដ្ឋមន្រ្តីថ្មីដែលស្នើដោយប្រធានាធិបតី Thongloun Sisoulith ដោយប្រកាសតែងតាំងលោក Sonexay Siphandone ជានាយករដ្ឋមន្រ្តីជាមួយសំឡេងគាំទ្រច្រើនលើសលុបរហូតដល់ ១៤៩ ក្នុងចំណោម ១៥១ សំឡេង។
លោក Sonexay Siphandone ជាសមាជិកការិយាល័យនយោបាយនៃគណៈកម្មាធិការមជ្ឈិមបក្សប្រជាជនបដិវត្តន៍ឡាវ (LPRP) ត្រូវបានជ្រើសតាំងជាសមាជិកគណៈកម្មាធិការមជ្ឈិមបក្ស នាសមាជថ្នាក់ជាតិលើកទី៨ កាលពីឆ្នាំ ២០០៦ និងជ្រើសតាំងជាសមាជិកការិយាល័យនយោបាយនៃគណៈកម្មាធិការមជ្ឈិមបក្ស នាសមាជថ្នាក់ជាតិលើកទី១០ កាលពីឆ្នាំ ២០១៦កន្លងទៅ។
គួរបញ្ជាក់ថា មុនពេលជ្រើសតាំងជានាយករដ្ឋមន្រ្តី លោក Sonexay Siphandone ក៏កំពុងស្ថិតក្នុងតំណែងជាឧបនាយករដ្ឋមន្រ្តីឡាវផងដែរ៕
នាយករដ្ឋមន្រ្តីថ្មី លោក Sonexay Siphandone
ព័ត៌មានជាច្រើនទៀតសម្រាប់អ្នក
